MUA Rainbow Chan: 試妝篇

Rainbow試妝 :) 

果日我首先去rainbow到，佢真人比電話中nice。我呢期其實皮膚好差，因為period遲了成個月於是谷到成面都超多暗瘡，好樣衰，但亦係咁，令我真係見識到rainbow既功架! 

佢底妝真係化得好細緻，其實我都唔太識化妝，但佢會用手呀用掃呀咁幫我一層一層咁上色，佢係會溝色既，所以全面暗瘡包括凸起的暗瘡都遮到八成。我果時已經好amazed，但偏了心去新晉mua的我就同自己講，都唔係完全遮到丫，而且仲見到粗大毛孔，都唔係blogger講既零毛孔。但其實我心底裡都知，化妝只能改善大部分問題，而r已經幫我呢塊毛孔粗大兼夾爆左好多暗瘡又有微絲血管既面化左個接近完美既底妝。除了底妝，佢都留意到我大細眼既問題（我仲要呢排對眼損左，令到情況更明顯），佢好細心咁幫我痴雙眼皮膠紙，又幫我不停畫呀畫呀盡量修飾。佢做遮瑕呢部分真係好專業好認真!

態度方面，r真人又真係好似bloggers咁講咁好，佢幫我捲髮同痴假眼睫毛時真係好溫柔，同埋佢會好清楚俾我知道咩係正常感覺，例如佢話假眼睫毛一開始會有點唔舒服，但膠水乾左會ok架，到時可以忟返鬆少少。同埋佢又成日會對住我笑，咁我又對返佢笑，雖然我冇乜點講野，因為我話我好眼訓呀，但整個氣氛都係舒服自在的。

同埋我見佢有不時望下我塊面先落筆，同埋佢講d野好中，例如佢問我隻眼係咪試過有眼瘡（其實唔知點解佢咁問，但我的確細個成日有!)，仲有一樣雖然可能好多化妝既人都知但對於唔識化妝既我覺得佢好勁，就係佢幫我搽粉紅色eye shadow。點解咁講？事關我平日其實好少搽eye shadow，因為搽左通常仲樣衰，但唔知點解偏偏粉紅色就比較順眼，儘管明明d人成日話粉紅色會令雙眼好腫唔靚。於是我問rainbow，佢解釋因為我雙眼其實有點窩左入去，所以粉紅色反而適合我，而且適合的eye shadow顏色不多，聽完佢咁講終於解開我多年既謎，亦覺得佢好犀利。

同rainbow講我約左人請佢幫我落妝，佢都好溫柔咁幫我抺走部分既妝容同會問我想點整個頭。